Hmânlaiin, 'Hmeichhia leh pal chhia chu thlâk theih,' an tih in hre tawh!
Kan pi leh pûte khân inneihna hi serh leh sâng pawimawh takah an nei tih kan hriat bâkah, inṭhen hi an duh lo êm êm a; amaherawhchu, nupa inṭhen an remtih loh rualin eng emaw harsatna, loh theih loh thil a awm theih avângin inṭhen theihna dân fel takin an siam a, mâk, sumchhuah, sumlaitan, peksachang etc. leh sazumeidawh tih thlengin fing takin an inrêlbâwl a. Hetiang hian inṭhen an remtih loh laia a khawi zâwk zâwk pawhin nupui pasal ṭhen theih a nih sawi fiah nân huanpal chhia thlâk theih a nih anga nupui pasal pawh inṭhen leh thlâk theih a nih dân pa tîtî thiam deuhin, “Hmeichhia leh pal chhia chu thlâk theih,” an lo ti mai a ni a; a lehlamah, 'Pasal pakhat leh thing phur khat,' te pawh an ti bawk.
“Hmeichhia leh pal chhia chu thlâk theih,” tih thu hmeichhe hmusitna leh dah hniamna lam hawi zâwnga kan sawi ve ringawt mai ṭhîn hi, “Pathianin a zawm tawh chu mihringin ṭhen suh se,” kan tih bur tawh hnu pawha anni aia dân ṭha zâwk la chher chhuak hlei thei chuang lote hian kan pi pûte finna leh ro hlu hi kan palzam ve khanglângah kei chuan ka ngai a; mahni indah hniam zualna mai niin ka hria!
Kan pi pûte dân tha leh ṭawngkauchheh hian chhût chet a dâwlzia lam hi kan ngaihtuah ngai em le?
- Ngaihlungdum Mizo Culture & Tradition Research Institute®️
