Hmânlai Hmeichhe Dinhmun Ṭhenkhat I'n Thlîr Thuak Teh Ang
He thu hi tûnlaia hmeichhe dinhmun chawikân lam buaipuituten hmânlai Mizo pi pûten hmeichhia an dah hnuaihnunzia ti lama sawi chhuah nâna hmang an awm ṭhîn a, a chêpakaia chhût chian a ṭha hle. Kan pi leh pûte khân hmeichhia hi an humhalhin, Bible-in ‘bêl keh awl zâwk’ a tih ang chiah hian a dim pawh an dimdâwih hle. A nihna takah chuan mipa leh hmeichhe tih tûr kha fel takin an thliar thlap a; hna rum hautak leh ralṭi zawng zawng kha mipa kutah an dah a, hna nêm zâwk leh râlmuang kha hmeichhe kutah an dah ṭhîn a ni. Mipa chu ram lam hnaa mawhphurtu a niin, pachangin hmeichhia lo a vahtîr ngat phei chuan a tân mualphona a ni a; hmeichhia chu in lam rêlbâwltu, ram lama a mawhphurhna hla ber pawh tuikhura tui chawi a ni.
Tuikhur piah lam chu mipa chan a ni a; tuikhur chin in lam chu hmeichhe chanpual leh mawhphurhna a ni. Pa berin thuk tlawhchhana vaibêl pak khu hlat hlat chunga bai chhuan a liam pawha nu ber a auh zêlna chhan pawh, pâ chanpual a nih loh vâng a ni mai. Thlawhhma kawnga nu ber rit phur chunga a kal pâr pâr laia pa ber iptepui leh chempui nên chauha a kal nalh nalhna chhan pawh, sa leh râl laka a nupui vênhim a ngaih vâng a ni. Chutiang chu a nih avângin, hmeichhe tân in lam pawimawh rêl bâk ngaihtuah a ngai lo a, a bâk zawng chu pâ chanpual a ni tihna mai a ni. Hetiang hi a nih avângin tûnlaia hmeichhe dinhmun chawi kân leh humhim aupuitute hian, hmânlaia kan Mizo hmeichhe dinhmun ṭha lutuk ang khân, 'Hmeichhe finin tuikhur râl a kai lo,' tih hi, "Vawn nun reng ni rawh se," tia ṭang kawh tlat âwm zâwkah kei chuan ka ngai hial ṭhîn asin!
- Ngaihlungdum Mizo Culture & Tradition Research Institute®️
